Mah le mah kha kan tha tiah aa ruat i midang vialte kha zei i a rel lomi hna sinah Jesuh nih hi tahchunhnak bia hi a chim.
Mi pahnih cu biakinn i thlacam awkah an hung kal; pakhat cu Farasimi a si i a dang cu ngunkhuai khawltu a si.
Farasipa cu a dir i hi bantukin thla a cam: “ Maw Pathian, kei cu midang bantukin hak a kaumi, lih a chimmi, nu le pa sualnak a tuahmi ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn. Zarh khat chungah voi hnih lengmang rawl ka ul i chawva ka hmuhmi vialte cheuhra cheukhat kan pek,” tiah a ti.
Sihmanhsehlaw ngunkhuai kawltupa cu lamhlatpi ah a dir i vanlei hmanh zoh ngam loin a ttang aa cum i: “ Maw Pathian, kei misual cungah hin zaangfahnak ngei ko,” tiah a ti.
Hihi kan chimh hna: “Farasimipa kha si loin hi pa tu hi a sualnak ngaihthiam in inn ah a ttinmi cu a si. Zeicahtiah amah le amah aa ngantermi cu tthumh an si lai i, mi tangah aa dormi cu mingan ah ser an si lai,” tiah a ti.
Sihmanhsehlaw Pathian a bia taktakmi nih cun thlarau le biatak in an biak caan kha a ra lio i hika hi a phan cang. Hi bantukin a biami hna hi pa nih a duhmi cu an si.
Pathian cu thlarau a si i a biatu nih cun thlarau le biatak in an biak awk a si.
Hal u law an in pek hna lai, kawl u law nan hmuh lai, king u law innka an in hunpiak hna lai.
Zeicahtiah a halmi paoh cu pek an si lai, a kawlmi paoh nih an hmuh lai i a kingtu paoh cu innka kha hunpiak an si lai.