Nanmah le nanmah i hleng hlah u, ahohmanh nih Pathian cu an deh kho lo; mi nih an tuh bangin an zun ko lai.

A pumsa duhnak lo ah a tuh ahcun, thihnak kha a zun lai; Thlarau lo ah a tuh ahcun, zungzal nunnak kha a hmuh lai.

Cucaah tthatnak tuah kha ba hlah u sih, kan ngol lo ahcun a theitlai kan zun caan kha a phan ve ko lai.

Cucaah a caan kan ngeih fate, mi cungah tthatnak tuah kha i zuam u sih.

A donghnak ah Bawipa he nan i pehtlaihnak thawng le a tthawnnak a nganmi thawngin nan thazang cu i tthawnter chin ko u, Khuachia hlennak kha nan doh khawh nakhnga Pathian nih an pekmi hna ralthuam vialte kha i hruk u. Cun ni tthalo kha a hung phanh tikah nan ral cu nan rak doh khawh lai i a donghnak tiangin nan i tuk hnu zongah nan dir hmun ah khan fek tein nan dir kho lai.

Cucaah timh cia tein dir u: nan taisawm caah baitak kha fek tein i sawmh u; nan ttang phaw caah dinnak kha i benh u; nan kedan caah daihnak Thawngtha chim thathawhnak kha i danh u. Zumhnak kha phaw caah i ken zungzal u law cu phaw cun Khuachia nih mei bantuk a simi thal in an kah hna tikah nan rak hmih khawh hna lai.

Cun luchin caah khamhnak kha i chinh u law Thlarau nih an pekmi hna vainam caah Pathian bia kha i lak u. Hi vialte hi thlacam bu in tuah u law Pathian kha bawmhnak hal u. (Thlarau nih an hruai hna ningin zeitik caan paoh ah thlacam u. Hi caah timh cia tein um zungzal u law nan hnabei zei tik hmanh ah dong hlah u; Pathian mi hna caah thlacam zungzal u.)