Jesuh nih cun a hun naih hna i, “Vancung le vawleicung i a ummi nawlngeihnak vialte cu pek ka si cang.
Cucaah khua zakip ah va kal u law miphun vialte kha a ka zultu ah va ser hna u, Pa le Fapa le Thiang Thlarua min in tipilnak ve pe hna u.
Kan fialmi vialte hna hi an zulh nakhnga va cawnpiak hna u. Cun hihi philh hlah u, nan sinah a zungzal in caan dongh tiang ka um lai,” tiah a ti hna.
Hi tuurun chung i a um lomi, ka ta a simi tuu dang an um rih. Annih zong kha ka ratpi ve hrimhrim hna lai.
Ka aw kha an ngaih i tuukhal pakhat tangah tuurun khat ah an cang lai.
Annih cu a thawh hna i, “Messiah nih cun sifahnak kha a in lai i ni thumnak ni ah thihnak in a tho tthan lai, cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai, tiah aa ttial,” tiah a ti.
Cun nannih cu hi thil vialte a hngaltu tehte nan si.
Asinain Thiang Thlarua nan cung i a tlun tikah cun, tthawnnak in nan khat lai, Jerusalem khua le Judaram vialte le Samariaram le vawleicung khuazakip ah ka tehte nan si lai, a ti.
Jerusalem khua chungah khan an lut i an rak umnak khaan chungah khan an va kal; thlacam awkah a tu le atu a bu tein an i pum;
Amah cu an biak i an caan vialte cu Biakinn chungah khan Pathian thangthatnak caah an hmang.