“Ka Pa nawlbia kha ka ngaih i a dawtnak chungah ka um bantukte in ka nawlbia nan ngaih ahcun kan dawtnak hna chungah hin nan um ve lai.
Ka lunglawmhnak kha nan chungah a um i nan i lawmhnak cu a tlin nakhnga, hi bia cu kan chimh hna.
Kei ka nawlbia cu hihi a si: Keimah nih kan dawt hna bantukte hin pakhat le pakhat i daw u.
Mi nih a hawile caah dawtnak ngan bik a ngeih khawhmi cu an ca i a nunnak pek hi a si.
Nannih cu sin-um kan ti i hna lo, zeicahtiah sinum nih cun a bawipa tuahmi kha a hngal lo. Sihmanhsehlaw ka Pa sinin ka theihmi vialte kha kan chimh dih hna caah, ka hawile, ti tu in kan ti cang hna.
Nannih nih cun nan ka thim lo, keimah nih kan thim hna i a hmun ding thei kha tampi in va tlai tuah u, tiah kan fial hna. Cucaah ka min in nan halmi paoh cu ka Pa nih an pek hna lai. Nawl kan pekmi hna cu, hihi a si: pakhat le pakhat i daw u.
Biatak kan chimh hna; sal cu a bawipa nakin a ngan deuh bal lo. Fialmi zong a fialtu nakin a ngan deuh bal lo. Mi ngan si a duhmi cu nan sinum a si awk a si; bawi cem si a duhmi cu nan dihlak sal a si awk a si.
Zeicahtiah Mi Fapa hmanh hi riantuanpiakmi si awkah ka rat tuang lo; midang raintuanpiaktu si awkah le mi tampi tlanhnak ding ca i ka nunnak pek awkah pei ka rat cu,” tiah a ti hna.